واقع شوفيرية التكاسي
1- كلهم معهم شهادات جامعية ومش لا قيين شغل أو كانوا في الخليج واستقالوا ورجعوا (على قولتهم طبعا)
2- العداد ظالم ومش موفيه معهم بالمرة ومديونين علشان هيك فوق العشر آلاف تكسي بالبلد واللي بده يستثمر بيروح بيشتري تكسي.
3- الشرطة حاطين حطاطهم على مخالفات وهمية وهم عمرهم ما خالفوا وكله تبلي وظلم وتصفية "حسابات شخصية" مع الدولة.
4- دائما في أزمة طرق وسير حتى لو طلعت معهم الساعة ثلاثة الفجر وحكيتله انك رايح للطواريء بالمستشفى لازم يوخدك من شارع الاستقلال او من شارع الأردن ويلف فيك عمان كلها علشان (العداد الظالم) يحسب.
5- معظمهم عندهم مشاكل في الحساب أو في البصر لما يكون العداد 75 قرش بطلع معه دينار ولما يطلع دينار وخمس قروش بيصير دينار ونص ولازم انت يكون عندك (شوية ثقة فيه) واذا راجعته بيبلش يحسب الامتار والكيلومترات ويضربها في لتر البنزين أحسن من بيل غيتس وأسرع من أحدث كمبيوتر.
6- أما إذا بتعطيه الاجرة ناقصة فلس واحد بيشرشحك وبيلم عليك الناس وبيصورك بالموبايل وبيهجم عليك مع زملاؤه وبيوخد (محفظتك والهوية إذا انت موظف) وشنطتك إذا كنت طالب علشان يروح يشكي عليك واذا في سندويشة او بسكوتة او علبة عصير في الشنطة ما تتوقع تلاقيها بعد الطوشة.
7- كلهم بيحبو الحكي واللت والعجن والعرط وإذا ما بترد عليه وبتاخد وبتعطي معه بيلف عمان كلها لحد ما تبلش تحكي وبيخليك بالغصب تشاركه اعجابك بقصص البطولات لما طلعوله خمس سكرانين عطريق الصحرا وبطحهم وربطهم ولما لحقته الدورية من العقبة لعمان وراح عالمخفر وسلم حاله في النهاية (المهم دوخهم وما خلاهم يمسكوه) ولما بنت حلوة من بنات الجامعة حاولت تغويه وهو طبعا تف عليها وضربها كفين ونزلها ورمالها الاجرة بوجهها ..الخ الخ الخ.
8- أغلبهم بيدخن وكتير منهم بيحششو ودايما في رمضان مفطرين وإذا بتتجرأ وبتسأله ليش مفطر بيتنهد وبحكيلك ( آآآآه بس،، أنا معي القلب والرئة وشراييني مسكرات والدكتور منعني من الصيام وحكالي اذا بتصوم بتموت وما رح تلحق آذان العصر .
9- أهم شي لما تطلع معه علشان يوصلك على مكان بيحملك الف جميلة إنه وصلك وبيظل يرمي حكي إنه كان رايح يتغدا أو يتعشى أو يفطر بالمطعم خمس نجوم القريب او الاولاد بيستنوه عالغدا بس شافك واقف بالمطر او تحت الشمس فحزن عليك وحن وقال حرام خليني أوصله وأكسب أجر من الله (مش منك يعني).
10- الأجنبي (الغشيم) رقم واحد عنده والبنت الحلوة رقم 2 والشب الله لا يرده خليه واقف علشان يكون زلمة ويتحمل والعجوز والختيارة الله يلعن اولادهم والعقوق كيف تاركينهم هيك وما بيرضى يطلعهم مش نذالة لكن (جكر في اولادهم)!!
11- لما تطلع معه بنت بيصير عزابي ولسانو بينقط عسل وبيعطي الاولويات كلها للسيارات والكل بيتجاوز عنه وما بيمشي اكتر من40 عالسرعة النظامية. وعيونه والمراية بتتركز ع النص .واذا شاف شحاد عالاشارة بيصير نعوم كتييير وبيعطيه ربع دينار وما بيرضى ياخد بدالها علكة او فاين وبيكرر مقولة (روح عمو روح،لا حول ولا قوة الا بالله وين اهل الخير عنهم)؟؟
12- أما إذا كان لحاله أو معه شب وحس انه شحاد بدو يقرّب من التاكسي بيشل عرضه قبل ما يصل وما بيخلي كلمة سافلة إلا بيحكيله ياها وإذا الشرطي قريب شوية بيحمّل الشحاد بالتاكسي وبيرميه قدام الدورية بعد ما يكون هراه ضرب وسب وتف وشلاليط.
13- دايما رقم موبايله عالزجاج الامامي أو عالمراية واحيانا بيكتبه على ظهر الكرسي القاعد عليه طبعا مع الاسم المستعار او اسم الشهرة (النكنيم )يعني زي (أبو عذاب ، مزعل كل البنات، مقلّع الدواوين، دنيا غدارة ، شبعان غدر) أو عبارتهم المشهورة دايما (كل يوم أدفن صديقا حتى أصبح قلبي مقبرة للكلاب..) بيحزنو يا حراااام....
موضوع: واقع شوفيرية التكاسي 
الأحد مارس 13, 2011 10:18 am
